فيوتشر للرحلات

السياحة في شرم الشيخ

حجز فنادق في شرم الشيخ : شرم الشيخ أو مدينة السلام أحد أكثر الوجهات شعبية في الوطن العربي والعالم بالكامل، والمدينة المصنفة عالمياً كثالث أفضل موقع للغوص على مستوى العالم.
إذا كنت من محبي السفر لا يجب أن تفوت زيارة شرم الشيخ، فبجانب الشواطىء الساحرة التي تطل على البحر الأحمر والشوارع النظيفة والحياةالمرفهة، هي أيضاً المدينة التي تناسب الجميع.
تناسب محبي الإستجمام والإسترخاء على الشواطىء ومواجهة أشعة الشمس الساطعة، أو محبي الغوص والغطس ورؤية الشعب المرجانية الملونة الساحرة والأسماك التي تسبح في كل مكان حولك.
وتعرف عالمياً بأنها المدينة صاحبة النشاطات المتنوعة وبأنها المدينة الساهرة التي لا ينام زائريها، لكثرة أماكن السهر والتنزه بها، والنشاطات التي يمكن ممارستها بشكل عام، سواء خلال فترة الصباح مثل الرياضات المائية “الغطس – الغوص – ركوب الأمواج – رحلة بحرية – رحلات سفاري بيتش باجي” وغيرها.
أو خلال فترة المساء مثل الجلوس في المقاهي المنتشرة في شرم الشيخ أو زيارة المحلات وشراء إحتياجاتك اليومية أو الهدايا، أو الإستمتاع بالسهر وبخاصة في خليج نعمة الشهير، أو قضاء ليلة بدوية والتعرف على نمط جديد للسهر.
إلى جانب كل النشاطات التي تحتوي عليها شرم الشيخ والتي تجذب الملايين
لزيارتها سنوياً، تجذب المدينة أيضاً محبي المناظر الطبيعية الساحرة لقضاء
أوقات في زيارة أماكن مثل محمية راس محمد، ومحمية نبق، وجزيرة
تيران، وسلاسل الجبال التي تقع إلى جانب البحر الأزرق في مشهد رائع،
والصحراء المريحة التي يقصدها الزائرين في الصباح لإستكشافها وفي
المساء للتخييم بها في بعض المناطق، أو خوض تجربة العشاء البدوي في
ليلة جميلة لا تنسى.لمزيد من عروض شرم الشيخ

تعرف على أكتر أماكن رومانسية في العين السخنة

لو بتقضي شهر العسل ومش عايز تسافر بعيد ؟ او زهقت من الروتين وعايز تخرج مراتك أو خطيبتك في مكان رومانسي بعيد عن زحمة و دوشة القاهرة ؟ عايز تحتفل بعيد الحب في مكان جديد و مميز ؟ طب عيد ميلاد حبيبتك قرب و نفسك تعملها مفاجأة حلوة وجديدة ؟ يبقى مفيش قدامك غير السخنة لأنها بتجمع ما بين الطبيعة والأناقة والجمال والهدوء في نفس الوقت ، ده غير إنك هتوصلها في ساعة ونص بس ! هناك هتقضي يومك مع حبيبتك في أشيك المطاعم في السخنة على البحر و في أجمل الفنادق هناك . و علشان متتعبش نفسك و تدور كتير ، إحنا قررنا نقدملك أحلى الأماكن في العين السخنة و أكترها رومانسية علشان تكسر الروتين و تقضوا يوم جميل مع بعض .

كليك بيتش كلوب “club Clique Beach ”

المكان ده يعتبر تحفة حقيقية في العين السخنة ومن أجمل الأماكن اللي ممكن تقضي فيها يوم مع حبيبتك على البحر وهيكون مناسب جداً ليكوا لو بتحبوا السهر ، هناك هتسمع أحلى مقاطع الموسيقى و الأغاني و هتأكل أحلى أكل.

العنوان: المكان ده موجود في الكيلو 46 طريق السويس الغردقة في شاطئ خاص بستيلا دي ماري و أسعاره وهمية لأنك هتدفع في اليوم 200 جنيه بس ! هتلاقي أحلى من كده أيه !

كلوب إم بيتش “Club M Beach”

لو أنت من محبي الأماكن الهادئة ، فده هيكون الإختيار الأمثل ليك لأنه بيوفرلك قائمة إستثنائية من أشهى الأطباق و المشروبات ، ده غير إنك هتستمتع بالموسيقى الهادئة و إطلالته الساحرة على البحر و الجو الجميل لأنه مكان مفتوح.

العنوان: كلوب إم بيتش موجود في كمباوند أزها و على بعد 150 كم من القاهرة.

جاز ليتل فينيس “Jaz Little Venice”

و ده من أرقى الفنادق في العين السخنة و أكثرها رومانسية و بيقدملك خدمات على مستوى عالمي ، هناك هتلاقي أماكن كتير تستمتع فيها بأحلى الأوقات مع مراتك/ خطيبتك أو حبيبتك لأن جواه مطعمين بيقدموا أشهى المأكولات ، و لو نفسك تسهر معاها بليل هتلاقي مكان تحفة إسمه " تيرازينا لوبي بار" .

العنوان: الكيلو 36 طريق العين السخنة السويس.

مطعم الجزيرة “El Gezira Restaurant”

لو إنت من محبي المأكولات البحرية و عايز تستمع بجو راقي ، يبقى المكان ده هيكون الإختيار الأمثل ليك ، ده غير إنه بيصنف على إنه من أجمل المطاعم في السخنة بشكل عام.

العنوان: هو موجود في فندق موفنبيك السخنة بشارع الزعفرانة.

تيدا سويس ان “Teda Swiss Inn Plaza”

و ده من أحلى الأماكن اللي ممكن تقضي فيها يومك مع حبيبتك لو أنتوا من محبي الأكل الصيني ، المكان تصميمه جميل وأجوائه وألوانه روعة وهيدخلك في مود جميل وهادي في نفس الوقت.

العنوان: المكان ده موجود في فندق تيدا سويس إن بلازا – شمال غرب خليج السويس القطاع الإقتصادي و يعتبر المطعم الرئيسي هناك.

لا دولشي فيتا “La Dolce Vita”

و ده من الأماكن المحترفة في الأكل الإيطالي ، و موجود في ستيلا دي ماري سي كلوب في طريق السويس – السخنة.

العنوان: شارع الجيش إستاد المنصورة ، قبل سوبر ماركت أولاد رجب و بجوار قاعة ريفيرا.

بونتي فيتشيو “Ponte Vecchio”

و ده بيصنف على إنه من أجمل الأماكن في السخنة و بيجذب الأجانب بشكل كبير لأنه بيجمع ما بين كل حاجة أنت نفسك فيها ، موسيقى إيطالية روعة ، و أكل تحفة ، و هدوء ، و أطلالة روعة على البحر ، و كمان أسعاره معقولة . مستني أيه تاني ؟

العنوان: المكان ده موجود في الكيلو 46 طريق العين السخنة.

أضف تعليق

نفسك تعمل فوتو سيشن مميز لفرحك؟

أماكن سياحية موضوعات

فرحك أو خطوبتك قرب و عايزين تعملوا سيشن Outdoor Session مميز ومختلف و محتارين تعملوه فين ومش قادرين تختارو مكان معين ؟ احنا هنسهل عليكم الموضوع ونحاول نقسم اماكن التصوير لاربع انواع
حدائق أو منتزهات
أماكن أثرية او تاريخية و صحراوية
أماكن نهرية أو بحريM
أماكن مجنونة مطرقعة وتصلح جدا ل Pre-Wedding أو الكاجوال سيشن

أولاً: الحدائق أو المنتزهات اللى ممكن تاخد فيها صور حلوة جدا مميزة :
1- حديقة الأسرة بالرحاب Family Park
مزاياها : من الأماكن اللى فيها اماكن حلوة ولتكون ممتازة فى التصوير - مكان هادى
عيوبها : اسعار دخول الكاميرات والفوتو سيشن عالية إلى حد ما وبتحدد بدخول 3 / 4 أشخاص + الكاميرا
أو دخول 4 أشخاص + الكاميرا + 15 دقيقة في البرج (سعر تذكرة دخول المصور و 3 أفراد 1500 جنية ) .

2- حديقة الازهر Al Azhar park
مزاياها : مساحتها كبيرة وواسعة - فيها مناظر حلوة جدا للقاهرة - سعر التذاكر مناسب اوى .
عيوبها : الحديقة زحمة فى ايام الاجازات - مفيهاش خصوصية - فيها رسوم لدخول الكاميرا ( تذكرة الدخول ب 20 جنية لأي فرد والتصوير ب300 جنيه العرسان )

3- جزيرة المعادي
مزاياها : مساحتها كويسه - المنظر هناك يجنن مع النيل والخضرة الصور بتطلع حلوة - سعر التذكره من ( 20 – 40 جم)
عيوبها : زحمة فى ايام الاجازات وكمان اسعارها مرتفعه نسبيا فى الاجازات
يوجد رسم دخول للكاميرا ( 500 رسوم دخول عريس وعروسه + الكاميرا )
4- حديقة الأندلس " مدخل الزمالك "
مزاياها :موجود فيها كذا قسم ( القسم الاندلسى - القسم الفرعونى - القسم الاسلامى ) - سعر التذكره تقريبا ( 5 جم ) - مش زحمة معظم الوقت
لكن فيه رسوم بردو لدخول الكاميرا ( سعر التصوير 400 جنيه وثمن تذكرة الدخول لأي فرد 5 جنية زى ما قولنا ) .

5- حديقة الأسماك "جبلاية الأسماك"
مزاياها : المنظر فيها مختلف وخصوصا عند الجبلاية - سعر التذكرة 5 جنيه - مفيش زحمة إلا الأيام اللى بيكون فيها الحفلات او المعارض
عيوبها : مواعيدها من ( 9.30 صباحاً لـ 5 مساءاً ) بس - لازم يبقى فيه متابعة لايام الحفلات - ممكن الجبلاية تتقفل فى أي وقت
فيه رسوم لدخول للكاميرا (تذكرة تصوير عريس وعروسة 250 جنية )
6- حديقة العروبة "صلاح سالم"
مزاياها : محدش يعرف عنها حاجة تقريبا - لسة نضيفة - مفيش رسوم دخول للكاميرا
العيوب: احياناّ بيكون فيه حفلات او معارض ممكن تعمل زحمة
7- سفاري بارك Safari Park "الهرم"
مزاياها : فيها كتير مساحات واسعة - مناظر مختلفة ما بين خضرا وحيوانات وبحيرات - سعر التذكرة من (10- 15 جم) - مفيش رسم دخول للكاميرا
العيوب: الزحمه خلال الإجازات
ثانياً : الأماكن الأثرية والمعمارية والصحراوية اللى ممكن يتصور فيها صور مميزة:-
1- شارع المعز
مزاياها : من الأماكن الممتازة فى التصوير - مساجد وبيوت بتبقى حلوة فى التصوير - رسوم دخول بسيطة - مفيش تصريح للتصوير ولا رسم دخول الكاميرا
عيوبه : زحمة طول الوقت - مفيش اى خصوصية - اضاءة الشارع ضعيفة جدا
2- الأهرامات
المزايا:فيه مساحة واسعة - مش زحمة معظم الوقت - سعر تذكرة الدخول 5 جنية تقريباً
العيوب : مواعيد العمل من ( 10صباحاً - 6مساءاً ) بس - التعامل الامنى صعب شويتين - البايعين وكمان بتوع الحصانه والجمال بينطوا فى الصور وفيه تطاول في طلب البقشيش
فيه رسم دخول للكاميرا

3- القلعة
مزاياها : المنظر منها تحفة وانت شايف القاهرة ادامك - تراث وتفاصيل بتظهر بشكل حلو اوى فى الصور - مش زحمة وسط الأسبوع - سعر تذكرة الدخول: 5 جنيهات للمصريين نهارا، و60 جنيه ليلا
العيوب: مواعيد العمل من (9-5) فقط - زحمة لو فى رحلات او اجازات
فيه رسوم دخول للكاميرا
4- قصر البارون
المزايا : خلفية تصوير مختلفة ومميزة - خصوصية ومش بيكون زحمه
العيوب: يحتاج تصريح أمني تكلفته من (500 -900 جم) - ممنوع التصوير داخل القصر- مفيش مصدر اضاءة غير أضواء القصر
( بيكون لو هتصور الصبح بـ 1200 وبليل بـ 1600 )
5- قصر محمد علي " في المنيل "
مزايا : خلفية تصوير مختلفة ومميزة – ركنات كثيرة للتصوير
العيوب: حجز مسبق - فيه رسوم دخول للكاميرا ( التذكرة 50 جنية للتصوير العادي اما لو عريس وعروسة بـ 1000 جنية )
6- بانوراما حرب اكتوبر
المزايا : مكان مختلف ومميز - الصور فيه بتطلع حلوة جدا سواء بالنهار أو بليل - فيه مناظر فريدة وكويسه جدا للتصوير
العيوب : حجز مسبق - رسوم دخول الكاميرا والمصور ( بيكون ب 1400ج شامل رسوم التصوير بالنادي للعريس والعروسة وسيشن ساعة )

7- الاماكن الصحراوية الى ممكن نصور فيها صور مميزة:-
أولا: ليه نتصور فى صحرا؟
1- لان الصور فعلا بيكون شكلها مختلف عن الصور الطبيعية للسيشن
2- بتوفر مساحة واسعة جدا
3- تنفيذ أكتر من فكرة فيها.
ثانياً: الاماكن الصحراوية حوالي 65% من مساحة مصر معظمها خارج حدود القاهرة.
ثالثاً: من أهم الأماكن داخل القاهرة والمختلفة فى التصوير
1- محمية وادى دجلة
مزاياها: منطقة هادية ومميزه جدا - مش زحمة - مساحة واسعة جدا _ خلفيات رائعه متنوعه بين الجبال والأشجار
عيوبها : الحجز المسبق - يوجد رسم دخول للكاميرا
2- منطقة سقارة
مزاياها : منطقة هادية ومميزه جدا - مش زحمة - مفيش تصاريح للتصوير- مساحة واسعة جدا
عيوبها: بعيد عن القاهرة
ثالثا: الاماكن النهرية أو البحرية اللى ممكن تتنصور فيها صور مميزة:-
ممكن تعمل سيشن تصوير فى مركب شراعى على النيل (رومانسية بقى)
الكورنيش بقى ( الزمالك او المعادى ) بس الصبح بدرى عشان الزحمة
جزيرة فى النيل ..زي " جزيرة الدهب – جزيرة الوراق – فناره المعادي – منطقة كافيهات ميزاج المعادي "
رابعاً: أماكن مجنونة مطرقعة تنفع لفوتوسيشن فيه صور مميزة وتصلح جدا ل Pre-Wedding او الكاجوال سيشن:-

مدخل مدينتي : تحفه واماكن نضيفه جدا وطبعا ببلاش
الاوبرا : فى اماكن تحفة فى الاوبرا ومعظم الناس مش عرفنها بس احيانا بيبقى فى غلاسة شوية
بورتو كايرو porto cairo : فكرة مختلفة شوية فى تصوير سيشن بعيدة عن الزحمة
الفيوم : وادي الريان وبحيرة قارون
افريكانو بارك : فيها اماكن جميله جدااااا وسط الحيوانات والمناظر الرائعه
اسكندريه : القلعه و شواطئ اسكندريه وخصوصا منطقه الصخور وأبو قير والمنتزه
بورتو السخنه : الجمع بين الجبال والمياه والتلفريك وتعتبر قريبه من القاهره
ملابس صعيدى او فلاحي او اسكندراني مع عمل الجو الملائم لها
Arteka Space - Coworking Space حلو جدا لصور الـ سيشن وبيعملوا حفلات واعياد ميلاد وفيه اماكن للبنات بس المكان ده في بلكونات وقاعدات على الارض والوان جواه حوالي 6 أوض كل أوضة فيها بلكونه وكله شغل يدوي فنى من الخيش و الكاوتش و الحبال و فوانيس الاضائه الهادية وكمان قاعدة عربي ..العنوان: 26 شارع شبين متفرع من ميدان صلاح الدين , مصر الجديدة ، الساعه ب 5 جنيه - لا يوجد رسوم للكاميرا
حديقة فجنون " على طريق سقارة " تذكرة 500 جنيه للسيشن .

أضف تعليق

أهم الاماكن السياحية فى الغردقة

اعمل ايه لما اروح الغردقة ؟ سؤال بنسأله لنفسنا لو مسافرين لأى مكان . اكيد كلنا بنكون محتاجين قبل اى سفرية نعرف كل حاجة عن المكان اللى هنزوره ونشوف البلد دى هنعمل فيها ايه .
احنا سهلنا عليك كل التفكير وهنجاوبك عن كل تساؤلاتك بخصوص السفر والسياحة فى الغردقه لو رايح تقضى هناك الويك اند
وكمان هنعرفك الرحلات البحرية والسفارى وكل شئ هناك بيتكلف كام عشان تبقى مظبط برنامج رحلتك وعارف هيكلفك اد ايه .
أما بقي لو بتفكر تسافر الغردقه الايام دى يبقي لازم تلحق تحجز فى ارخص سعر لرحلة الغردقة وقضي الويك اند وعيش

سميت مدينة الغردقة بمصر ( جوهرة البحر الآحمر ) لانها بتمتلك مجموعه شواطئ رائعه وتشتهر بالطبيعه الساحره وبها العديد من المعالم والانشطة السياحية الساحرة وأشهرها :
متحف الرمال ،جزيرة الجفتون ، الاكواريوم ، الجونة وسهل حشيش دة غير انك كمان هتستمتع فى الغردقة بأحلى رحلات سفارى والرحلات البحريه وهتشوف احلى المناظرالطبيعية وهنكلمكم عنها بالتفصيل :
أولا الرحلات البحرية والانشطة الترفيهية فى الغردقة : ( الاكواريوم - دولفين شو - متحف الرمل - سي سكوب - الغواصة سندبناد - الجلاس بوت - جزيرة يوتوبيا - جزيرة الجيفتون - الرحلات البحرية - سهرة الف ليلة وليله )

1 - الاكواريوم : فيه 3 اكواريوم فى الغردقة
-جراند أكواريوم ( بمنطقة مجاويش )
-اكواريم الدهار ( حي الدهار امام مستشفي الغردقة العام )
-اكواريم الأحياء (الشهير بأكواريوم حامد جوهر/ الاحياء بجوار كليه التربيه )
وهنتكلم بالتفصيل عن رحلة جراند أكواريوم الغردقة
مبدأياً الاكواريوم هو عبارة عن خزان من عشرات ملايين لترات المياه ، وواحد من أكبر الاكواريوم في العالم ، حيث يعد جراند أكواريوم الغردقة منزل لآلاف الأنواع من الكائنات البحرية
بمعنى انك لو عايز تعمل دايفنج و تشوف البحر من تحت من غير ما تاخد الريسك حلك موجود في " جراند أكواريوم الغردقة اللى بيعتبر حوض من اكبر الاحواض في العالم فيه حوالي 400 سمكة
قرش و فيه اكبر عدد من اسماك قرش النمر في العالم كله.
الحوض ده دخل موسوعة جينيس لانه هيخليك تدخل الحياة البحرية ب 3 طرق..
اولهم "النفق" و النفق ده موجود في الدور الأرضي و بطول 48 متر...هتشوف الغواصين و هم بيأكلوا السمك

تاني حاجة "حديقة الكائنات البحرية" و دي في الدور الثاني ... دي بقى حاجة تانيه هتوديك 3 بيئات مختلفة
(تعالب المياه , اسماك البيرانا, بطاريق الهومبولت, التماسيح الأمريكية, , سمكة الاسد, سلطعون العنكبوت العملاق, حصان البحر, ثعابين الحدائق, اسماك آرتشر)
و لو بصيت تحت رجلك هتلاقي الأرض ازاز بيوريك الحوض و انت واقف فوقيه كأنك راكب جلاس بوت

2- دولفين شو :
-دولفين شو مكادي ( مدخل مدينة مكادي )
في خليج مكادي الغردقة هتشوف أجمل دولفين شو ممكن تشوفه وأطفالك هتستمتع وتنبهر بيه جدا
العرض بيتكون من 4 فقرات رئيسية...
1- فقرة أسد البحر ودي هنشوف فيها أسد البحر وهو بيعمل بعض الخدع المائية وبيرقص سامبا
2- فقرة قطط البحر ودي هنشوف فيها قطط البحر وهي بتغني وكمان تعزف على الجيتار
3- فقرة الفقمة ودي هنشوف فيها الفقمة ليلا أشهر فقمة في مصر والشرق الأوسط وهي بتقلد أصوات الحيوانات وغيره كتير
4- فقرة الدولفين ودي هنشوف فيها الدلافين مع المدربين وهما بينطوا ويلعبوا ويرقصوا كمان.
لو طالع الغردقة متنساش تزوره وانت هناك وخصوصا لو معاك اطفال

3- مدينه الرمال أو متحف الرمل ودة (أمام فندق صن رايز مملوك، منطقة القرى، بجوار سنزو مول).
فكرة «مدينة الرمال» تعد بمثابة متحف شيق، وبيحتوي على تماثيل رملية جذابة لأشخاص لعبوا أدوار مهمة في تاريخ البشرية ، زى نابليون بونابرت، وإيزيس، وكليوباترا، والإسكندر الأكبر، و
الأسطورة الإغريقية «لافوكا فيرتا»، والسلطان محمد الفاتح.. وصولا إلى الشخصية معشوقة الأطفال «باتمان»، و«كينغ كونغ»، و«سبايدرمان»، وغيرها من أساطير وعجائب العالم، زى الأهرامات
وأبو الهول، وشواهد متنوعة من مختلف الحضارات والعصور تتجسد جميعها في تماثيل رملية يضمها المتحف.

4- المراكب ذات النوافذ البانورامية (سي سكوب /ميرميد وخلافه ) :
ودى واحدة من اجمل الرحلات لمشاهدة المناظر الطبيعية بالبحر الاحمر وقضاء اجمل وقت مع العائلة وتصوير الأسماك الملونة والشعب المرجانية عن طريق شباك بانورامى

5-جلاس بوت :
ودى بردو رحلة ممتعه جدا هتشوف من خلالها الشعب المرجانية وأسماك البحر الأحمر النادرة من خلال قاع المركب الزجاجى , الرحلة تستغرق ساعة و نصف بالابحار و الجولة بالجلاس بوت والرحلة دى بتكون مدتها ساعه ونصف ،

6- الغواصة سندباد:
ودى ايضا رحلة للاعماق وبتكون مدة الرحلة 3 ساعات يبدأ البرنامج بالانتقال من الفندق الى المارينا الخاصة بالغواصة سندباد بالغردقة.
- وبتشوف متحف للاسماك والكائنات البحرية وبيتم عمل جولة بالمركب لمدة 20 دقيقة لحد ما توصل لمكان الغواصة
-بعد كدا بيتم النزول علي سطح الغواصة ومنه الي داخلها والنزول بها تحت الاعماق الساحره للبحر الاحمر والغوص بها لمدة 40 دقيقة علي عمق 25 متر تحت الماء مع مجموعة من غطاسين محترفين يداعبون اسماك البحر
الاحمر المتنوعة حتى تقترب من الغواصه ليستمتع الضيوف بالمناظر الرائعة.

7 - سهره الف ليله وليله ( فندق الف ليله وليله كل يوم مساءا )
الامسية بتكون بالاستعراضات الشرقية و عرض التاريخ المصرى فى الصوت و الضوء و المتحف ودى واحدة من اجمل الاماكن الترفيهية فى الغردقة . تبعد حوالى 20 دقيقة عن مطار الغردقة , وحوالى 25 دقيقة عن مركز مدينة الغردقة .
تشمل سهرة الف ليلة وليلة الاتى : متحف الاستنساخ - عرض الصوت والضوء - النافورة الراقصة - أكروبات الخيول - عرض التنورة - استعراضات الفنون الشعبية والفلكلورية - رقص شرقى
8- وطبعا لو لاقيت عجل تركبه وتلف بيه الغردقة يبقى حلو أوي وفيه أسواق جميلة جدا هناك مستوى راقي وعالي ومطاعم أسعارها غالية جدا ومتوسطة هتلاقي كل حاجة في الغردقة في الأكلات .

9 - جزيرة يوتوبيا :
جزيرة يوتوبيا هي اجمل الجزر الموجودة في البحر الاحمر بمنطقه سومه باي ، وتقع على بعد 45 ك.م تقريبا جنوب الغردقه .
الجميل في الرحله ده الشعب المرجانيه اللي بتعمل عندها سنوركلنج ، منطقه ساحره بمعني الكلمه

10 - رحلة جزيرة الجفتون :
تقع جزيرة الجفتون على بعد 11 كم من شواطئ مدينة الغردقة، وتبلغ مساحتها أكثر من 17 كم،
رحلة جزيرة الجفتون الرحلة الأكثر شهرة على الاطلاق فى الغردقة , واغلب زوار الغردقة قاموا بالرحلة دى أكتر من مرة ودة لان فيها متعة وترفيه فى مياه البحر الأحمر النقية و المناظر الطبيعية الخلابة و الشعاب المرجانية
المذهلة حيث تعيش الكثير من الكائنات البحرية اللى بتجذب كل زوار الغردقة للقيام بالعوم و الغطس فى تلك المناطق القريبة من الجزيرة , كل دة بيخلى من رحلة جزيرة الجفتون ذكرى رائعة لن تنساها
و يـوجـــد 4 انــــواع مـــن رحـــلات الســفــــاري لنفس الجزيرة تختلف في السـعـر حـســب الامـكــانيات بداية من حجم المركب ومستواه مروراً بجودة الاطعمه والمشروبات والخـدمـه وانـتــهــــاء بـ خدمات السنوركل وما يقدم
علي الجزيرة من خدمه وهي بالترتيب كالاتي :-
* رحلة المحميه Mahmya
* رحلة باراديس Paradise
* رحلة أورانج Orange Bay والمكان دة رائع وبيبعد عن الغردقة حوالى 40 دقيقة بالمركب لكن هتشوف فيه مناظر تحفه
* رحـلــة جـفـتــون ...... ( ودي الرحلة العادية اللي الاغلبية بيطلعوها لرخص سعرها طبعاً ) لـكــن باقى الرحلات تكلفتها بتتعدى ال 500 جنيه للفرد

أضف تعليق

معلومات تهمك قبل السفر لواحة سيوه

أماكن سياحية موضوعات نصائح السفر

عاوز تسافر رحلة لواحة سيوة ومش عارف تبتدى التجربة دى منين؟ المقال دة هيكون بمثابة دليل ليك هنعرفك ازاى تروح سيوة؟ وممكن تعمل ايه هناك؟ واهم المزارات اللى ممكن تشوفها ومواسم الزيارة السياحية والعلاجيه

النهاردة هنتكلم عن سيوة وعن الحياه هناك و الفنادق و السفاري والتخييم والاماكن اللي هتزورها كمان
الواحة البعيدة دى، لازم تسحرك بجمالها ،هى أكتر مكان في العالم هتحس فيه بالسلام النفسي، الناس كلها هناك بتحب بعض، لو نسيت اللابتوب بتاعك في الشارع هاترجع تلاقيه مكانه !

كمان فيها بحر الرمال الأعظم اللى بيغطى ما يزيد عن 72.000 كيلو متر مربع وهو يشكل الحد الشمالي للصحراء، ويعد بحر الرمال الأعظم ثالث أكبر حقل من الكثبان الرملية في العالم. وتعد سيوة البوابة الشمالية وأفضل نقطة انطلاق لرحلة سفاري إلى أحد
اولا : كيفية السفر الي واحة سيوة ؟
ممكن تسافر لسيوة عن طريق غرب ووسط الدلتا من اليكس (الموقف الجديد) او القاهرة (عبدالمنعم رياض - الماظه) واسأل عن المواعيد وممكن مع أفواج طالعين من شركة سياحة

ثانيا : اماكن الاقامة فى واحة سيوة واشهر فنادق سيوة
سيوة متنوعة جدا في الأماكن اللي ممكن تقعد فيها، يعني لو على المستوى المادي، هتلاقي حاجات من أول 80 جنيه لحد 10 آلاف جنيه في الليلة (مش مبالغة.. فيه فندق الليلة فيه ب 600 دولار).
لكن الأهم تشوف أنت عايز تسكن في مكان عامل إزاي، في هناك فنادق بيئية، مبنية من مزيج الملح والطين، فيه كامبات، فيه فنادق عادية، فيه بيوت سيوية. كل حاجة فيهم ليها مميزاتها، وأنت وذوقك والمكان اللي بترتاح فيه، عشان كده هتحتاج تسأل نفسك:
- المكان يكون بيت سيوي ولا فندق ولا شقة فندقية ولا كامب؟
- لو فندق يبقي بيئي ولا عادي مسلح وخرسانة ؟
- لو كامب يبقي خيمة ولا غرف مجهزة؟
- بكهرباء ولا من غير؟
- تحب المكان بعيد عن السوق ولا قريب

فنادق عادية
باراديس - جاردين - الباب ان شال - كنوز- دريم لوج
طب عشان احنا المصريين بنحب ناكل واهم حاجة الاكل فلازم تجرب الاكل السيوي
في أنواع أكل سيوي لازم تجربها، على راسهم طبعًا الفراخ واللحمة اللي معمولين بطريقة "أبو مردم"، دي طريقة تسوية للأكل، اللحمة أو الفراخ بتتبل كويس لكذا ساعة، بعدين بتتحط في باستيله حديد بتدفن في حفرة فيها نار، عشان كده اسمها أبو مردم، عشان
بيتردم عليها، وتتساب تستوي ساعات كتير برضه، بس النتيجة هتبقى من أجمل الحاجات اللي هتاكلها.
ثالثا : أهم معالم ومزارات سيوة السياحية
سيوة أكتر حاجة مميزة فيها هي الطبيعة البكر، من أقل الأماكن اللي الإنسان حط فيها التاتش بتاعه، فيها مزارات كتير تتراح، لكن الأجمل هو الاستجمام في الأماكن الطبيعية والعيون الكبريتية وأجمل منظر للنجوم ممكن تشوفه في حياتك.
أهم المزارات في سيوة:
- منطقة الحفريات في بحر الرمال الأعظم، دي فيها حفريات من من ملايين السنين أيام ما كانت المنطقة دي جزء من المحيط، هتشوف بقايا عظام حوت ضخم، وقواقع ونجوم بحر متحجرة.
- قلعة شالي (سيوة القديمة)، دي المدينة اللي كان عايش فيها أهل سيوة زمان، وكان ليها سور من بره وبوابة، لكن السيول هدتها، ونزل أهل سيوة للعيش تحت، لكن بقايا المدينة لسه باقية بطرازها البيئي الفريد.
- جبل الدكرور، واحد من أكبر جبال سيوة، تقدر تشوف من فوقيه سيوة والمناطق المحيطة بها، وهو نفس الجبل اللي بيتعمل فيه عيد السياحة، العيد اللي بقاله أكتر من قرن ونص، وبيبقى في الليالي القمرية اللي بتصادف في شهر أكتوبر من كل سنة
- ممكن تطلع الصحراء: الصحراء بيتعمل فيها حاجات كتير، ممكن تعمل سفاري هناك وساند بوردنج، ممكن تشوي أنت وصحابك وتاكلوا، بعدين تقضوا ليلة في الصحراء في حضن النجوم، وممكن تلاقي حفلة سيوي ترقص على المزيكا السيوي للصبح.
- سوق شالي: تقدر تشتري من هناك المشغولات اليدوية والتمور والزيتون وأنواع مربات مش موجودة غير في سيوة، زي مربى كركديه وبلح وزيتون.
- بلاد الروم: دي مجموعة مقابر صخرية بيرجع تاريخها للعصر الروماني، كان بيبقى قدام كل مقبرة عمودين أو تلاته، والمومياء بتتحط على سرير جوه قبر بيطل من الصخر، لكن اللي باقي منها حاليًا هي الفتحات في الصخر وقواعد العواميد
وايضا البحيرات المالحة، ألوانها سماوية ونسبة الملح فيها عالية جدًا، لدرجة إنك مستحيل تقدر تغطس فيها هتلاقي المياه بترفعك
لازم تنزل عيون سيوة الكبريتية، في منها الساقع والسخن، غير فايدتها للجسم، فهي تجربة استرخاء واستجمام لازم تجربها. منهم:
- فطناس في جزيرة فطناس
وعين الشمس (كليوبترا الماظه _كامب الجبل _ بير واحد _ بحيرة الملح _ بحيرة المياه الباردة في السفاري بحر الرمال )
المواصلات اللي ممكن تستخدمها تركب عجل او موتوسيكل او كارته

رابعا مستلزمات لازم تكون معاك وأنت مسافر سيوة
1 - أهم أهم أهم حاجة، لازم يكون معاك حاجة للناموس، دي الحاجة الوحيدة اللي لو نسيتها هتعيش رحلتك متكدر وهتبقى لقمة سهلة ليهم، عندك حاجتين ممكن تجيبهم، سبراي OFF من أي صيدلية، مش هقدر أقولك سعره لإنه بيزيد كل يوم، في اختيار تاني أفضل
وأرخص، ممكن تجيب "Lemongrass" من فروع نفرتاري، فيه فرع في سيتي ستارز وفرع في الدقي
2 - صورتين من البطاقة وش وظهر (واحدة لمكان الإقامة - الثانية لتصريح المخابرات لدخول الصحراء/السفاري)
3 - جاكيت تقيل، شراب تقيل، كوفيه/شال ثقيل، الجو بالليل بيبقى سقعة، وهات لبس خفيف للنهار لإنه أغلب الوقت دافي.
4 - لو مسافر ومعاك مشروبات كحولية لازم تبقى مقفولة ومعاك الفاتورة بتاعتها
5 - خد معاك كروكس/جزمة بحر عشان تقدر تنزل بيه البحيرات المالحة
6 - خد معاك مايوه طبعًا عشان تنزل العيون الكبريتية
7 - كاميرا، المناظر اللي هناك هتجننك وهتبقى عايز تصورها أكيد، ولو بتحب تصوير النجوم يبقى أنت لقيت الجنة بتاعتك، هات معاك ترايبود
معلومات عامة عن واحة سيوة
- الصحراء مافيهاش شبكة، لكن المدينة كلها هتلاقي فيها شبكة عادي، ممكن تشتغل هناك بس نصيحة بلاش، اتبسط بالطبيعة الفرص اللي زي دي ما بتتعوضش
- في هناك محلات تشتري منها أي حاجة بقالة تحتاجها، في سجاير، وفيه مصانع ميه، فأنت مش محتاج ميه
- اللبس اللي هناك محدود جدًا، وماعتقدش إنك هتلاقي مايوه مثلا، فياريت تتمم على حاجتك قبل ما تسافر

خامسا : مواسم الزيارة لواحة سيوة
سيوة فيها موسمين :
موسم الرحلات العلاجية وده من نص شهر ٦ لحد نص شهر ٩

موسم الرحلات السياحية وده في الشتا بيكون الجو هناك رائع
سادسا: أشهر منتجات سيوة وايه اللي تقدر تشتريه من هنا ؟
لازم تجيبوا بلح، زيتون، زيت زيتون، منتجات الملح، منتجات يدوية بالتطريز السيوي الجميل، سلطة الزيتون، عسل البلح، لويزا، كركديه، ملوخية ناشفة، مربي الزيتون، مربي البلح، مربي الكركديه
فى كمان فى سيوة جزيرة اسمها جزيرة طغاغين Taghaghien Island
هتستغرب من جمالها وروعة المناظر الطبيعية فيها ان المكان دة فى مصر اصلا
احنا جبنالكم صور للمكان عشان تاخدوا القرار انكم تروحوا سيوة بسرعه ومن غير تردد عشان فعلا سيوة جنة الله على ارض مصر
ومش بس كدة دى أنقى هواء و تقريبا المكان الأول للسياحة العلاجية فى العالم
دة غير ان سحر الرملة والجبال وفعلا الهواء النقى ميتوصفش .

أضف تعليق

10 اسباب تجعل زيارتك رائعة للاسكندرية في الشتاء

"إسكندرية بلدنا فى الشتا".. دائمًا ما نسمع هذه الكلمات من بعض أهالى المدينة، معلنين عشقهم لها فى فصل الشتاء، على الرغم من كثرة النوات، والرياح الشديدة التى تواجه المدينة، وانهيار العقارات القديمة والآيلة للسقوط، بما يتسبب فى كوارث كثيرة، والخوف من غرق المدينة بعد تهالك البنية التحتية للصرف الصحى، وإليكم 10 أسباب يعلن الإسكندرانية حبهم لها فى الشتاء:

1- السبب الأول يتمثل فى حالة الهدوء والسيولة المرورية التى تعيش فيها المدينة فى هذا الوقت، بسبب عدم تواجد المصطافين، والذين يتوافدون فى فصل الصيف للاستمتاع بشواطئ الإسكندرية.

2- كوباية شاى بالنعناع على لسان قلعة قايتباى، وهو ما يسعى إليه معظم السكندريين، ليستمتعوا به، وهم يتابعون تراطم أمواج البحر مع الصخور المحيطة بأسوار القلعة، مرتدين الملابس الثقيلة التى تمكنهم من الصمود لساعات فى هذا الطقس.

3- كوبرى ستانلى وكوباية حمص الشام، فعلى هذا الكوبرى المزين بالألوان المتناسقة مع الكبائن المقامة أسفله، تخلق إضاءة جذابة على أمواج البحر، الواسع وهو المكان الوحيد الذى قد تستطيع رؤية فيه البحر لمسافات بعيدة من مكان مباشر، وهناك تحتسى كوب "حمص الشام" لتدفئة الجسد للقدرة على الصمود.

4- جيلاتى عزة، فعلى الرغم من صعوبة الطقس والبرودة الشديدة التى قد تكون موجودة فى المدينة فى هذا الوقت، إلا أن الجميع يتهافت على فروع جيلاتى عزة المعروف بها الإسكندرية، ويطلب الجيلاتى بكل أنواعه مع البسكويت السكندرى الذى لا يعرفه غير أهل عروس البحر.

5- حدائق المنتزه، وهناك يتوافد الكثير من الشباب والعشاق، ليصطفوا أعلى الكوبرى المواجه لفندق فلسطين، المقام على حافة مياه الشاطئ، ينتظرون غروب أو شروق الشمس، فيبدوا المشهد وكأنه لوحة مرسومة.

6- ركوب العجل فى المعمورة، فمنطقة المعمورة بحرى، يكاد يختفى منها السكندريون فى فصل الصيف، بسبب الزحام الشديد، إلا أنها تكون فرصتهم فى فصل الشتاء، لخلو الفيلات الموجودة هناك من قاطنيها الذين يكون أغلبهم من خارج المدينة، فيفضلون تأجير العجل واستقلاله، فى شوارع المعمورة الواسعة المزينة بالأشجار.

7- صيد السمك على الكورنيش، فتجد وقت ارتفاع الموج، وتخبطه الشديد، عجوز يجلس على كرسى ويضع سنارته فى مياه البحر ليخرج منها أجود أنواع السمك، وفى منطقة محطة الرمل، تتفاجأ بعدد من الإسكندرانيين يقفون متابعين لعملية الصيد وطيور النوارس وهى تلتف حول مركب صيد قريبة.

8- ماراثون الجمعة على البحر، وهو الوقت المناسب لأكثر الفتيات التى ترغب فى ممارسة الرياضة فى الهواء الطلق، فتشترك فى ماراثون الجمعة، الذى يبدأ يوميًا من السادسة وحتى التاسعة صباحًا على كورنيش الإسكندرية، أو تقوم بممارسة الرياضة وحيدة دون خوف من التحرش اللفظى فى ظل الهدوء الذى يتمتع به الكورنيش فى هذا الوقت.

9- الاستمتاع بالأماكن التراثية القديمة بشكل هادئ، مثل البن البرازيلى، وشارع فؤاد الذى يمثل أقدم شوارع المدينة .

10- السير تحت مياه الأمطار، وهو المتعة المقدسة لدى الكثير من أهالى الإسكندرية الذى ينتظرون الشتاء للسير تحت أمطاره على كورنيش الإسكندرية و فى الأماكن التاريخية بها.

أضف تعليق

رحلة يوم واحد في بورسعيد وبور فؤاد

زهقت من السفر لاسكندرية والسخنة ونفسك في مكان جديد تقضي فيه داي يوز مختلف يبقي تابعنا واعرف الاكثر عن بورسعيد وبورفؤاد وازاي تروح واشهر الاماكن والمطاعم والاسواق وأفضل الفنادق الموجودة هناك

لناس المحبين للداي يوز هتكلم النهاردة عن مكان جديد الداي يوز بما أن اسكندرية في الوقت دا زحمة ومش هتستمتع بيها اوي هنتكلم عن بورسعيد من الامكان القريبة للقاهرة الى ممكن تسافر وترجع عادي في نفس اليوم زي اسكندرية تقريبا مواصلاتها حوالى 3 ساعات

بورسعيد

حقيقي البلد دى نضيفة جدا و جميلة جدا جدا و أجمل حاجة فيها هما ناسها فعلاً و طيبتهم و روحهم الحلوة اللي تخليك تحس إنك عارفهم و عايش معاهم من سنين
وكمان انت ممكن تلفها كلها و تروح بورفؤاد و تاخد لفة حلوة هناك و كل دا في يوم واحد بس ! وارخص من فسحة في وسط البلد

اللى رايح بورسعيد يطمن لانها مش بلد ممكن تتوه فيها خالص بالعكس الناس هناك متعاونة جدا و البلد صغيرة ف التنقلات سهلة أوي.

ازاي تروح بورسعيد من القاهرة
قدامك طريقتين الطريقة الاولي موقف السوبرجيت الترجمان كل يوم تقريبا في اتوبيسات بتطلع بورسعيد والاجرة بقت ب 60 جنيه والطريقة التانية تسافر بالقطر وبياخد تقريبا اربع ساعات
هتطلع من الموقف اول ما توصل و تسأل اروح المعدية ازاي ؟ هتلاقى فيه ميكروباصات من اول الشارع بتروح حتة اسمها شارع 100 و هتقوله ينزلك عند الميكروباصات اللي بتروح المعدية و من هناك هتاخد ميكروباص خط كسرى اللي هتنزل منه قدام شارع المعدية ( تسعيرة الميكروباص هناك 2 جنيه )
او ممكن تاخد تاكسى يوديك لهناك .. ولو انت من محبى المشى هنقولك توصل للمعديه ازاى مشى لو انت رايح بورسعيد بالقطر ..
هنطلع من محطه القطر هنلاقي قدامك حديقة الفارما هتمشي من جانبها يمين هنلاقي تمثال للرئيس الراحل محمد أنور السادات وبعد كده هنلاقي شارع اسمه مصطفي كامل هتمشي فيه 5 دقايق هتلاقي قدامك مبني هيئة قناة السويس من السور الخارجي هتاخد شارع رمسيس شمال من مصطفي كامل هتلاقي نفسك في ميدان المنشية هتاخد يمين هتلاقي المعدية

جولة فى بور فؤاد
هتركب المعدية اللي هتلحقها و هتستمتع بالمنظر جدا ، وانت راكب هتلاقى طيور النورس بتطير من حواليك .. والجميل في المعدية انها ببلاش تماما ممكن تركبها لوحدك او بعربيتك كمان و كل ما واحدة تتملى و تطلع بيبقى فيه واحدة بتطلع وراها على طول ف مش هتقف خالص تستنى بتاخد حوالى عشر دقايق بعدها بتنزل بورفؤاد ودة مكان من اجمل الاماكن من حيث الهدوء والجمال من الأماكن حرفيا اللى بتحسسك انك سافرت برة مصر.
هتلاقى فى بورفؤاد مسجد كبير جدا وطرازه جميل اسمه مسجد المجمع الإسلامي هتمشي من جنبه شمال هنلاقي بيوت من دور واحد جميله جدا نفس الشكل والمساحات تحس انك بره مصر وعندك كنيسة مارجرجس وحديقه المنتزه
المكان كمان في تأجير عجل ممكن تأجر عجلة تلف بيها بورفؤاد وفي شواطئ ممكن تخشها في واحد اسمه ستايل سكوير وهتصور البيوت اللي من جمالها في مسلسلات اتصورت هناك قبل كدا
المنطقة حلوة جدا و هادية و فعلاً شوارعها مبتزهقش منها و من جمالها فيه كافيه هناك اسمه سنترال بيرك في شارع الجمهوريه و دا قريب جدا من المعدية ممكن تتمشى لحد ما توصله او تركب تاكسى
كافيه سنترال بيرك ( Central perk ) ودة متاخد من مسلسل فريندز.. الكافيه أخذ الديزاين بتاعه بس .. ويعتبر كخدمة و ناس شغالة هناك فعلا من أحلى الكافيهات اللي هتتبسط بيه و بديكوراته و تفاصيله أوي ( محبين مسلسل فريندز لازم يعملوله زيارة )

ممكن تعمل ايه فى بورسعيد ؟

هتخلص الجولة في بورفؤاد وهترجع تاني المعدية هتعدي الناحية التانية هتركب تاكسي تقوله مول ( style square ) ودا مكان تحفة في مطاعم وكافيهات وحمام سباحة دخول حمام السباحة الفرد ب 65 جنيه وفي حمام سباحة مقفول للبنات واخره الساعة 3 العصر وفي شاطئ خاص بالمكان وعنده تأجير عجل برضه وفي لعبة paint ball ودى عبارة عن فريقين 10 اشخاص كل فريق 5 ومعاهم مسدساتهم ويضربوا بعض بالألوان والمكان في انشطة تانية

او لو عاوز تتمشى شوية في شارع اسمه الشهيد عاطف السادات دا بيطل على البحر المتوسط بس دا بيفضل يبقى التمشيه فيه بليل

المحلات بتبقى منورة والشارع جميل جدا ونضيف من احسن الشوارع فيه كل حاجه من قري سياحيه وفنادق وبنوك ومطاعم ومحلات ملابس وحدائق
وفيه بردو نادي واستاد المصري البورسعيدي واللي حابب يمشي شويه علي البحر منظر القواقع والصدف فيه جميل جدا من اوله لاخره القواقع مغطيه المكان

الشارع الموازي لي اسمه 23 يوليو هنلاقي فيه متحف بورسعيد الحربي وبعده مديريه امن بورسعيد قصادها مسله الشهداء ومتحف النصر للفن الحديث والمسجد التوفيقي في شارع سعد زغلول

نيجي بقا لاشهر الشوارع لشراء الملابس واماكن التسوق هنلاقي هناك شارع التلاتيني والحميدي والتجاري كلهم ورا بعض وموازين لبعض بس متتعبش نفسك هما يعتبروا شوارع نسخة من الموسكي و العتبه ونفس الاسعار بعدها هنكمل تمشيه هنلاقي سوق البالة

الكبير دا اكبر سوق للملابس المستعملة وفيه بردو في حي الزهور ووفيه بردو بحي الزهور مقابر الكومنولث بس احب اقول لاي حد عنده فكره مسبقه ان بورسعيد الملابس فيها رخيصه وبربع التمن بس مش كل حاجة هتعجبك ننتقل بقى للجد قدام سوق الباله علي