فيوتشر للرحلات: موضوعات

الرئيسية / موضوعات

‏إظهار الرسائل ذات التسميات موضوعات. إظهار كافة الرسائل

نفسك تعمل فوتو سيشن مميز لفرحك؟

فرحك أو خطوبتك قرب و عايزين تعملوا سيشن Outdoor Session مميز ومختلف و محتارين تعملوه فين ومش قادرين تختارو مكان معين ؟ احنا هنسهل عليكم الموضوع ونحاول نقسم اماكن التصوير لاربع انواع
حدائق أو منتزهات
أماكن أثرية او تاريخية و صحراوية
أماكن نهرية أو بحريM
أماكن مجنونة مطرقعة وتصلح جدا ل Pre-Wedding أو الكاجوال سيشن

أولاً: الحدائق أو المنتزهات اللى ممكن تاخد فيها صور حلوة جدا مميزة :
1- حديقة الأسرة بالرحاب Family Park
مزاياها : من الأماكن اللى فيها اماكن حلوة ولتكون ممتازة فى التصوير - مكان هادى
عيوبها : اسعار دخول الكاميرات والفوتو سيشن عالية إلى حد ما وبتحدد بدخول 3 / 4 أشخاص + الكاميرا
أو دخول 4 أشخاص + الكاميرا + 15 دقيقة في البرج (سعر تذكرة دخول المصور و 3 أفراد 1500 جنية ) .

2- حديقة الازهر Al Azhar park
مزاياها : مساحتها كبيرة وواسعة - فيها مناظر حلوة جدا للقاهرة - سعر التذاكر مناسب اوى .
عيوبها : الحديقة زحمة فى ايام الاجازات - مفيهاش خصوصية - فيها رسوم لدخول الكاميرا ( تذكرة الدخول ب 20 جنية لأي فرد والتصوير ب300 جنيه العرسان )

3- جزيرة المعادي
مزاياها : مساحتها كويسه - المنظر هناك يجنن مع النيل والخضرة الصور بتطلع حلوة - سعر التذكره من ( 20 – 40 جم)
عيوبها : زحمة فى ايام الاجازات وكمان اسعارها مرتفعه نسبيا فى الاجازات
يوجد رسم دخول للكاميرا ( 500 رسوم دخول عريس وعروسه + الكاميرا )
4- حديقة الأندلس " مدخل الزمالك "
مزاياها :موجود فيها كذا قسم ( القسم الاندلسى - القسم الفرعونى - القسم الاسلامى ) - سعر التذكره تقريبا ( 5 جم ) - مش زحمة معظم الوقت
لكن فيه رسوم بردو لدخول الكاميرا ( سعر التصوير 400 جنيه وثمن تذكرة الدخول لأي فرد 5 جنية زى ما قولنا ) .

5- حديقة الأسماك "جبلاية الأسماك"
مزاياها : المنظر فيها مختلف وخصوصا عند الجبلاية - سعر التذكرة 5 جنيه - مفيش زحمة إلا الأيام اللى بيكون فيها الحفلات او المعارض
عيوبها : مواعيدها من ( 9.30 صباحاً لـ 5 مساءاً ) بس - لازم يبقى فيه متابعة لايام الحفلات - ممكن الجبلاية تتقفل فى أي وقت
فيه رسوم لدخول للكاميرا (تذكرة تصوير عريس وعروسة 250 جنية )
6- حديقة العروبة "صلاح سالم"
مزاياها : محدش يعرف عنها حاجة تقريبا - لسة نضيفة - مفيش رسوم دخول للكاميرا
العيوب: احياناّ بيكون فيه حفلات او معارض ممكن تعمل زحمة
7- سفاري بارك Safari Park "الهرم"
مزاياها : فيها كتير مساحات واسعة - مناظر مختلفة ما بين خضرا وحيوانات وبحيرات - سعر التذكرة من (10- 15 جم) - مفيش رسم دخول للكاميرا
العيوب: الزحمه خلال الإجازات
ثانياً : الأماكن الأثرية والمعمارية والصحراوية اللى ممكن يتصور فيها صور مميزة:-
1- شارع المعز
مزاياها : من الأماكن الممتازة فى التصوير - مساجد وبيوت بتبقى حلوة فى التصوير - رسوم دخول بسيطة - مفيش تصريح للتصوير ولا رسم دخول الكاميرا
عيوبه : زحمة طول الوقت - مفيش اى خصوصية - اضاءة الشارع ضعيفة جدا
2- الأهرامات
المزايا:فيه مساحة واسعة - مش زحمة معظم الوقت - سعر تذكرة الدخول 5 جنية تقريباً
العيوب : مواعيد العمل من ( 10صباحاً - 6مساءاً ) بس - التعامل الامنى صعب شويتين - البايعين وكمان بتوع الحصانه والجمال بينطوا فى الصور وفيه تطاول في طلب البقشيش
فيه رسم دخول للكاميرا

3- القلعة
مزاياها : المنظر منها تحفة وانت شايف القاهرة ادامك - تراث وتفاصيل بتظهر بشكل حلو اوى فى الصور - مش زحمة وسط الأسبوع - سعر تذكرة الدخول: 5 جنيهات للمصريين نهارا، و60 جنيه ليلا
العيوب: مواعيد العمل من (9-5) فقط - زحمة لو فى رحلات او اجازات
فيه رسوم دخول للكاميرا
4- قصر البارون
المزايا : خلفية تصوير مختلفة ومميزة - خصوصية ومش بيكون زحمه
العيوب: يحتاج تصريح أمني تكلفته من (500 -900 جم) - ممنوع التصوير داخل القصر- مفيش مصدر اضاءة غير أضواء القصر
( بيكون لو هتصور الصبح بـ 1200 وبليل بـ 1600 )
5- قصر محمد علي " في المنيل "
مزايا : خلفية تصوير مختلفة ومميزة – ركنات كثيرة للتصوير
العيوب: حجز مسبق - فيه رسوم دخول للكاميرا ( التذكرة 50 جنية للتصوير العادي اما لو عريس وعروسة بـ 1000 جنية )
6- بانوراما حرب اكتوبر
المزايا : مكان مختلف ومميز - الصور فيه بتطلع حلوة جدا سواء بالنهار أو بليل - فيه مناظر فريدة وكويسه جدا للتصوير
العيوب : حجز مسبق - رسوم دخول الكاميرا والمصور ( بيكون ب 1400ج شامل رسوم التصوير بالنادي للعريس والعروسة وسيشن ساعة )

7- الاماكن الصحراوية الى ممكن نصور فيها صور مميزة:-
أولا: ليه نتصور فى صحرا؟
1- لان الصور فعلا بيكون شكلها مختلف عن الصور الطبيعية للسيشن
2- بتوفر مساحة واسعة جدا
3- تنفيذ أكتر من فكرة فيها.
ثانياً: الاماكن الصحراوية حوالي 65% من مساحة مصر معظمها خارج حدود القاهرة.
ثالثاً: من أهم الأماكن داخل القاهرة والمختلفة فى التصوير
1- محمية وادى دجلة
مزاياها: منطقة هادية ومميزه جدا - مش زحمة - مساحة واسعة جدا _ خلفيات رائعه متنوعه بين الجبال والأشجار
عيوبها : الحجز المسبق - يوجد رسم دخول للكاميرا
2- منطقة سقارة
مزاياها : منطقة هادية ومميزه جدا - مش زحمة - مفيش تصاريح للتصوير- مساحة واسعة جدا
عيوبها: بعيد عن القاهرة
ثالثا: الاماكن النهرية أو البحرية اللى ممكن تتنصور فيها صور مميزة:-
ممكن تعمل سيشن تصوير فى مركب شراعى على النيل (رومانسية بقى)
الكورنيش بقى ( الزمالك او المعادى ) بس الصبح بدرى عشان الزحمة
جزيرة فى النيل ..زي " جزيرة الدهب – جزيرة الوراق – فناره المعادي – منطقة كافيهات ميزاج المعادي "
رابعاً: أماكن مجنونة مطرقعة تنفع لفوتوسيشن فيه صور مميزة وتصلح جدا ل Pre-Wedding او الكاجوال سيشن:-

مدخل مدينتي : تحفه واماكن نضيفه جدا وطبعا ببلاش
الاوبرا : فى اماكن تحفة فى الاوبرا ومعظم الناس مش عرفنها بس احيانا بيبقى فى غلاسة شوية
بورتو كايرو porto cairo : فكرة مختلفة شوية فى تصوير سيشن بعيدة عن الزحمة
الفيوم : وادي الريان وبحيرة قارون
افريكانو بارك : فيها اماكن جميله جدااااا وسط الحيوانات والمناظر الرائعه
اسكندريه : القلعه و شواطئ اسكندريه وخصوصا منطقه الصخور وأبو قير والمنتزه
بورتو السخنه : الجمع بين الجبال والمياه والتلفريك وتعتبر قريبه من القاهره
ملابس صعيدى او فلاحي او اسكندراني مع عمل الجو الملائم لها
Arteka Space - Coworking Space حلو جدا لصور الـ سيشن وبيعملوا حفلات واعياد ميلاد وفيه اماكن للبنات بس المكان ده في بلكونات وقاعدات على الارض والوان جواه حوالي 6 أوض كل أوضة فيها بلكونه وكله شغل يدوي فنى من الخيش و الكاوتش و الحبال و فوانيس الاضائه الهادية وكمان قاعدة عربي ..العنوان: 26 شارع شبين متفرع من ميدان صلاح الدين , مصر الجديدة ، الساعه ب 5 جنيه - لا يوجد رسوم للكاميرا
حديقة فجنون " على طريق سقارة " تذكرة 500 جنيه للسيشن .

أضف تعليق

معلومات تهمك قبل السفر لواحة سيوه

عاوز تسافر رحلة لواحة سيوة ومش عارف تبتدى التجربة دى منين؟ المقال دة هيكون بمثابة دليل ليك هنعرفك ازاى تروح سيوة؟ وممكن تعمل ايه هناك؟ واهم المزارات اللى ممكن تشوفها ومواسم الزيارة السياحية والعلاجيه

النهاردة هنتكلم عن سيوة وعن الحياه هناك و الفنادق و السفاري والتخييم والاماكن اللي هتزورها كمان
الواحة البعيدة دى، لازم تسحرك بجمالها ،هى أكتر مكان في العالم هتحس فيه بالسلام النفسي، الناس كلها هناك بتحب بعض، لو نسيت اللابتوب بتاعك في الشارع هاترجع تلاقيه مكانه !

كمان فيها بحر الرمال الأعظم اللى بيغطى ما يزيد عن 72.000 كيلو متر مربع وهو يشكل الحد الشمالي للصحراء، ويعد بحر الرمال الأعظم ثالث أكبر حقل من الكثبان الرملية في العالم. وتعد سيوة البوابة الشمالية وأفضل نقطة انطلاق لرحلة سفاري إلى أحد
اولا : كيفية السفر الي واحة سيوة ؟
ممكن تسافر لسيوة عن طريق غرب ووسط الدلتا من اليكس (الموقف الجديد) او القاهرة (عبدالمنعم رياض - الماظه) واسأل عن المواعيد وممكن مع أفواج طالعين من شركة سياحة

ثانيا : اماكن الاقامة فى واحة سيوة واشهر فنادق سيوة
سيوة متنوعة جدا في الأماكن اللي ممكن تقعد فيها، يعني لو على المستوى المادي، هتلاقي حاجات من أول 80 جنيه لحد 10 آلاف جنيه في الليلة (مش مبالغة.. فيه فندق الليلة فيه ب 600 دولار).
لكن الأهم تشوف أنت عايز تسكن في مكان عامل إزاي، في هناك فنادق بيئية، مبنية من مزيج الملح والطين، فيه كامبات، فيه فنادق عادية، فيه بيوت سيوية. كل حاجة فيهم ليها مميزاتها، وأنت وذوقك والمكان اللي بترتاح فيه، عشان كده هتحتاج تسأل نفسك:
- المكان يكون بيت سيوي ولا فندق ولا شقة فندقية ولا كامب؟
- لو فندق يبقي بيئي ولا عادي مسلح وخرسانة ؟
- لو كامب يبقي خيمة ولا غرف مجهزة؟
- بكهرباء ولا من غير؟
- تحب المكان بعيد عن السوق ولا قريب

فنادق عادية
باراديس - جاردين - الباب ان شال - كنوز- دريم لوج
طب عشان احنا المصريين بنحب ناكل واهم حاجة الاكل فلازم تجرب الاكل السيوي
في أنواع أكل سيوي لازم تجربها، على راسهم طبعًا الفراخ واللحمة اللي معمولين بطريقة "أبو مردم"، دي طريقة تسوية للأكل، اللحمة أو الفراخ بتتبل كويس لكذا ساعة، بعدين بتتحط في باستيله حديد بتدفن في حفرة فيها نار، عشان كده اسمها أبو مردم، عشان
بيتردم عليها، وتتساب تستوي ساعات كتير برضه، بس النتيجة هتبقى من أجمل الحاجات اللي هتاكلها.
ثالثا : أهم معالم ومزارات سيوة السياحية
سيوة أكتر حاجة مميزة فيها هي الطبيعة البكر، من أقل الأماكن اللي الإنسان حط فيها التاتش بتاعه، فيها مزارات كتير تتراح، لكن الأجمل هو الاستجمام في الأماكن الطبيعية والعيون الكبريتية وأجمل منظر للنجوم ممكن تشوفه في حياتك.
أهم المزارات في سيوة:
- منطقة الحفريات في بحر الرمال الأعظم، دي فيها حفريات من من ملايين السنين أيام ما كانت المنطقة دي جزء من المحيط، هتشوف بقايا عظام حوت ضخم، وقواقع ونجوم بحر متحجرة.
- قلعة شالي (سيوة القديمة)، دي المدينة اللي كان عايش فيها أهل سيوة زمان، وكان ليها سور من بره وبوابة، لكن السيول هدتها، ونزل أهل سيوة للعيش تحت، لكن بقايا المدينة لسه باقية بطرازها البيئي الفريد.
- جبل الدكرور، واحد من أكبر جبال سيوة، تقدر تشوف من فوقيه سيوة والمناطق المحيطة بها، وهو نفس الجبل اللي بيتعمل فيه عيد السياحة، العيد اللي بقاله أكتر من قرن ونص، وبيبقى في الليالي القمرية اللي بتصادف في شهر أكتوبر من كل سنة
- ممكن تطلع الصحراء: الصحراء بيتعمل فيها حاجات كتير، ممكن تعمل سفاري هناك وساند بوردنج، ممكن تشوي أنت وصحابك وتاكلوا، بعدين تقضوا ليلة في الصحراء في حضن النجوم، وممكن تلاقي حفلة سيوي ترقص على المزيكا السيوي للصبح.
- سوق شالي: تقدر تشتري من هناك المشغولات اليدوية والتمور والزيتون وأنواع مربات مش موجودة غير في سيوة، زي مربى كركديه وبلح وزيتون.
- بلاد الروم: دي مجموعة مقابر صخرية بيرجع تاريخها للعصر الروماني، كان بيبقى قدام كل مقبرة عمودين أو تلاته، والمومياء بتتحط على سرير جوه قبر بيطل من الصخر، لكن اللي باقي منها حاليًا هي الفتحات في الصخر وقواعد العواميد
وايضا البحيرات المالحة، ألوانها سماوية ونسبة الملح فيها عالية جدًا، لدرجة إنك مستحيل تقدر تغطس فيها هتلاقي المياه بترفعك
لازم تنزل عيون سيوة الكبريتية، في منها الساقع والسخن، غير فايدتها للجسم، فهي تجربة استرخاء واستجمام لازم تجربها. منهم:
- فطناس في جزيرة فطناس
وعين الشمس (كليوبترا الماظه _كامب الجبل _ بير واحد _ بحيرة الملح _ بحيرة المياه الباردة في السفاري بحر الرمال )
المواصلات اللي ممكن تستخدمها تركب عجل او موتوسيكل او كارته

رابعا مستلزمات لازم تكون معاك وأنت مسافر سيوة
1 - أهم أهم أهم حاجة، لازم يكون معاك حاجة للناموس، دي الحاجة الوحيدة اللي لو نسيتها هتعيش رحلتك متكدر وهتبقى لقمة سهلة ليهم، عندك حاجتين ممكن تجيبهم، سبراي OFF من أي صيدلية، مش هقدر أقولك سعره لإنه بيزيد كل يوم، في اختيار تاني أفضل
وأرخص، ممكن تجيب "Lemongrass" من فروع نفرتاري، فيه فرع في سيتي ستارز وفرع في الدقي
2 - صورتين من البطاقة وش وظهر (واحدة لمكان الإقامة - الثانية لتصريح المخابرات لدخول الصحراء/السفاري)
3 - جاكيت تقيل، شراب تقيل، كوفيه/شال ثقيل، الجو بالليل بيبقى سقعة، وهات لبس خفيف للنهار لإنه أغلب الوقت دافي.
4 - لو مسافر ومعاك مشروبات كحولية لازم تبقى مقفولة ومعاك الفاتورة بتاعتها
5 - خد معاك كروكس/جزمة بحر عشان تقدر تنزل بيه البحيرات المالحة
6 - خد معاك مايوه طبعًا عشان تنزل العيون الكبريتية
7 - كاميرا، المناظر اللي هناك هتجننك وهتبقى عايز تصورها أكيد، ولو بتحب تصوير النجوم يبقى أنت لقيت الجنة بتاعتك، هات معاك ترايبود
معلومات عامة عن واحة سيوة
- الصحراء مافيهاش شبكة، لكن المدينة كلها هتلاقي فيها شبكة عادي، ممكن تشتغل هناك بس نصيحة بلاش، اتبسط بالطبيعة الفرص اللي زي دي ما بتتعوضش
- في هناك محلات تشتري منها أي حاجة بقالة تحتاجها، في سجاير، وفيه مصانع ميه، فأنت مش محتاج ميه
- اللبس اللي هناك محدود جدًا، وماعتقدش إنك هتلاقي مايوه مثلا، فياريت تتمم على حاجتك قبل ما تسافر

خامسا : مواسم الزيارة لواحة سيوة
سيوة فيها موسمين :
موسم الرحلات العلاجية وده من نص شهر ٦ لحد نص شهر ٩

موسم الرحلات السياحية وده في الشتا بيكون الجو هناك رائع
سادسا: أشهر منتجات سيوة وايه اللي تقدر تشتريه من هنا ؟
لازم تجيبوا بلح، زيتون، زيت زيتون، منتجات الملح، منتجات يدوية بالتطريز السيوي الجميل، سلطة الزيتون، عسل البلح، لويزا، كركديه، ملوخية ناشفة، مربي الزيتون، مربي البلح، مربي الكركديه
فى كمان فى سيوة جزيرة اسمها جزيرة طغاغين Taghaghien Island
هتستغرب من جمالها وروعة المناظر الطبيعية فيها ان المكان دة فى مصر اصلا
احنا جبنالكم صور للمكان عشان تاخدوا القرار انكم تروحوا سيوة بسرعه ومن غير تردد عشان فعلا سيوة جنة الله على ارض مصر
ومش بس كدة دى أنقى هواء و تقريبا المكان الأول للسياحة العلاجية فى العالم
دة غير ان سحر الرملة والجبال وفعلا الهواء النقى ميتوصفش .

أضف تعليق

9 ضوابط احترازية بالبازارات السياحية لمواجهة فيروس كورونا.

موضوعات

أبلغت غرفة محال السلع السياحية البازارات فى جميع أنحاء الجمهورية باشتراطات العمل، تزامنا مع عودة السياحة الدولية فى ثلاث محافظات ساحلية هى مرسى مطروح والبحر الأحمر وجنوب سيناء، وشددت على ضرورة الالتزام بها.

وأصدرت وزارة السياحة والآثار ضوابط استئناف من خلال كتيبين باللغتين الإنجليزية والعربية يتضمنان كافة الضوابط التى اعتمدتها الوزارة لعودة السياحة الدولية لعرضهم على الأسواق السياحية المختلفة وتعريفهم بما تقوم به مصر من جهد لضمان رحلة آمنة لزائريها، تلك الإجراءات حظت بإشادة من منظمى الرحلات حول العالم بما يبشر بالعودة السريعة لحركة السياحة إلى مصر، وتلك الضوابط شهدت جهدا كبيرا حتي تخرج بتلك الصورة المشرفة للسياحة المصرية.

واشتملت الضوابط على كل الإجراءات التى سيقابلها السائح خلال رحلته لمصر بداية من المطار وحتى عودته لوطنه، كذلك الإجراءات الاحترازية داخل الفنادق والمنتجعات، وتلك التى تتم فى المطاعم والبازارات والمواقع الاثرية، وذلك بهدف حماية السائح والعاملين بالقطاع معا. وتضمنت الشروط وفقا لمنشور الغرفة

1. توفير قفازات طبية وكمامات جديدة بالمحال للعملاء لارتدائها والتخلص منها بطريقة امنة.

2. وضع ملصقات على الارض لتحديد أماكن الوقوف فى الصفوف للحفاظ على المسافات الآمنه، بين الاشخاص.

3. وضع لافتات داخل المحال للتنبيه بعدم لمس المعروضات.

4. توفير أدوات وقاية شخصية لجميع العاملين من معقمات ومطهرات وغيرها.

5. توعية العاملين بالمحال بجميع المعلومات الخاصة بفيروس كورونا والوقاية منه وكافة التدابير الواجب اتباعها لعدم الاصابة.

6. اخطار وزارة الصحة والسكان فورا بأى حالة اصابة او اشتباه فى الاصابة بين العاملين.

7. التزام العاملين بارتداء الكمامات طوال ساعات العمل.

8. تعقيم وتطهير الاسطح بصورة منتظمة.

9. اتخاذ أقصى ما يمكن من الحيطة والحذر فى تطبيق الاجراءات حفاظا على صحة العاملين والرواد.

تسليم 94 فندقا بالبحر الأحمر شهادة الصحة والسلامة لاستقبال النزلاء

موضوعات

أعلنت منال صلاح، مدير مكتب وزارة السياحة بمحافظة البحر الأحمر، أنه تم عملية التفتيش من قبل لجان وزارة السياحة والصحة وغرفة المنشآت علي 110 فنادق سياحية حتي الآن بمحافظة البحر الأحمر للتأكد من تطبيق الإجراءات والاشتراطات التي نص عليها قرار مجلس الوزراء .

وأضافت مدير مكتب وزارة السياحة بالبحر الأحمر لـ"اليوم السابع"، أنه حصل علي شهادة السلامة والصحة من الـ 110 فنادق الذي تم معاينتهم قرابة 94 فندقا سياحيا وتم استخراج 15 شهادة جديدة غير مدون عليها الالتزام بنسبة اشغال 50% سيتم تسليمها للفنادق التي تم فحصها قريبا مع الالتزام باستقبال نسب اشغال بحد أقصي 50% لحين اشعار آخر .

وتفقد الأسبوع الماضى الدكتور خالد العنانى، وزير السياحة والآثار، الإجراءات الاحترازية داخل فنادق ومطار الغردقة وذلك استعدادا لعودة السياحة وحركة الطيران بداية يوليو المقبل، برفقة الطيار محمد منار، وزير الطيران

وقام وزير السياحة والاثار بتطبيق تجربة عملية للتوضيح عملية التطبيق على النزلاء، حيث قام بتعقيم يده أولا ثم قياس درجة الحرارة، ومن ثم ارتدى الكمامة وتابع الإرشادات والعلامات الإرشادية الموجودة على الأرضيات للحفاظ على المسافات والتباعد بين الأشخاص.